الشعب قام شد اللجام
وقف حصانه فى وش المدام
ودور مدافعه وسكت الكلام
من كام سنه والظلم ماشى فى ارضنا
من كام سنه واحنا عبيد لحضرتك
كان ناقص نبوس كل يوم جزمتك
مانت السلطان والملك حضرتك
طب بزمتك .. بزمتك
بحلفك وبزممك
امتى نصرت فى يوم امتك
بعتنا برخص التراب
دوقتنا اصناف العذاب
سففتنا ياما التراب
جوعتنا نومتنا على الرصيف
بدخل حروب علشان الرغيف
طابور طويل شكله مخيف
واخرة المتمه
جايبلنا نظيف
اهو بدأ ينضف علينا كلنا
حتى المعاش مبقاش حقنا
امتى يارب تزيح دى الغمه عننا
تعبنا منك كفايه بقى
ياريس ده عهدك مرار وشقى
ضهرى انحنى فى عز الصبا
قوللى ياريس
انت الغلط ولا الغلط فيا انا
قوللى ياريس الدعم ليا
ولا دعم للحراميه
اللى نهبونى بعينهم القويه
يبقى ظالم وبصمتك يبقى مظلوم
كفايه بقى مليتنا هموم
ارحل ياريس مش عايزين جنابك
ارحل ياريس هسيبك ليوم حسابك
ربك كريم مابينساش عبيده
لكل الخلق بيمد ايده
وانت قطعت ارزاق كتير
كفايه حرام فين الضمير
فوق ياريس دا اليوم قريب
والله ساعتها لوزع ملبس
عالغريب قبل الغريب
هزغرد وافرح واغنى
واحمد ربنا انه شال الغمه عنى
ارحل ياريس وسيبنا فى حالنا
كفايه فى عهدك المرار هو حالنا
حرام ياريس دانت بتقول علينا ولادك
سندك حمايتك ايدك دراعك
ليه بتظلم وبالظلم بتفتخر
وليه حاجز المحبه بيدك بيتكسر
محمد البحيرى
ليست هناك تعليقات:
إرسال تعليق