علمونا فى المدارس
ازاى ابقى حر
علمونى ازاى اعمل
اللى ينفع ومش يضر
علمونا ان الكلام من غير علام جهل وتخلف
علمونا اننا منصدقش اللى
عمّال على بطال بيحلف
حاكولنا ياما تراث قديم
وازاى جحا كان حاكم
وازاى الغنى فى الفقر ساكن
علمونى ازاى اربى ولادى على الفضيله والشرف
وازاى اكتشف ان حياتى مليانه
لعب وترف
علمونى ازاى ما اعبدش الشحاته
وهما اللى صنعوا وزارة للشحاته
علمونا واحنا لسه صغيرين
سندريلا كانت جميله
بس تعبانه وفقيرة
وازاى الامير حبها
من فردة نعلها
علمونا فى المدارس اننا من اصل مصرى
ياعنى الحضارة
ياعنى التاريخ
ياعنى اكون انسان سابق عصرى
علمونى ازاى اكرة الظلم والظالمين
علمونى انى اشكى لربى
وغير ربى هشكى لمين
علمونى ...
ان البكا بس للحريم
اللى تولول بس هى الحريم
وعلمونى ان اللى يخرج على حاكم ظالم
يبقى اسطورة
يبقة هوا الاصل
واتباعه الصورة
بس نسيوا يعلمونى
ان صورتك يابلد تنزل من عيونى
ان نيلك وارضك
طينك وشعبك
انساهم ولو نسيونى
ايوة نسيوا يعلمونى
ليست هناك تعليقات:
إرسال تعليق